Destacada actuación dos atletas do S. Xerome

Destacadísima actuación dos atletas do Club Deportivo San Xerome no Campionato Galego de Campo a Través, celebrado o 23 de febreiro no circuíto de Castrelos (Vigo), organizado pola Federación galega de deporte para persoas con discapacidade intelectual. Un total de 11 Clubs Galegos estiveron presentes no citado circuíto.

 

Na categoría de competición (máxima categoría feminina), Amparo Ferreira, recentemente galardoada como deportista guardesa destacada, obtivo a medalla de prata por detrás da atleta do Club Chapela Sonia García, completou o podium a atleta das Esclavas de Mos, Pilar Rodríguez. Na mesma proba a atleta do Club San Xerome, Maite Santos, chegou a meta en 6º lugar.

Na categoría de competición masculina, o atleta guardés Borja Cadilla , acadou o terceiro posto (repetindo o posto da edición do pasado ano). O gañador da proba foi Carlos Oitavén do Club San Rafael de Vigo, a medalla de prata foi para Sergio Rodríguez do Club Chapela. Luis Antonio Sández do Club San Xerome foi o 5º clasificado nunha proba moi competida.

No resto das categorías, Francisco Martínez Varela, foi 3º en adaptada masculina, e Rosa María Álvarez, 10ª en xogo feminino.