FAI CLIC E DESCUBRE O NOVO DESEÑO DA WEB CULTURAL NOTICIASOROSAL.ES

Noticias O Rosal estreou o 7 de marzo novo deseño e contidos. Este blog manterase na rede, de momento, ata novo aviso, como complemento á páxina web

A VILA DO ROSAL DESPIDE CON EMOCIÓN A JOSÉ MARTÍNEZ GONZÁLEZ "PEPIÑO BERDEAL"

O ex-funcionario do Concello do Rosal e presidente da Asociación de Comerciantes da vila, era un dos veciños máis apreciados dos últimos tempos

VITORIA DE GABRIEL MARCELLI EN LLEIDA NO CAMPIONATO DE ESPAÑA DE TRIAL

O piloto rosaleiro vence na categoría júnior na proba valedeira para o “Spa RFME Campeonato de España de Trial Individual 2015”

ACTO DE CLAUSURA DO CURSO DE MONITOR DE FÚTBOL BASE CELEBRADO EN O ROSAL

A Casa Consistorial acolleu a entrega de diplomas e clausura do Curso coa presenza dos coordinadores José Luis Mosquera e Manuel Mosquera.

MÁXIMA EXPECTACIÓN ANTE A CHEGADA DA SEXTA EDICIÓN DA CARPA CARNAVAL DE FORNELOS

Entre outros, actuarán dende o venres 13 ata o martes 17 de febreiro, nestas Festas de Entroido: Traffic House, Dj Carlie, Diego Mei, Vallejo, Micy Dj, etc

A PRAZA DO CALVARIO ACOLLEU A VISITA E RECEPCIÓN DOS REIS MAGOS DE ORIENTE

As Súas Maxestades estiveron durante horas na vila do Rosal repartindo multitude de agasallos a pequenos e maiores, entre eles, libros e lambetadas

A ROMARÍA DE SAN MARTIÑO 2014 EN O ROSAL CELEBROUSE O DOMINGO 30 DE NOVEMBRO

A saída do Santo en procesión dende a igrexa parroquial de Santa Mariña, na Praza do Calvario, ata a súa ermida, foi ás 10:30 horas.

O PILOTO ROSALEIRO GABRIEL MARCELLI PROCLÁMASE TRICAMPIÓN DE ESPAÑA DE TRIAL

Gabriel Marcelli Carballido adxudícase o título tras vencer en Cabanillas de la Sierra (Madrid). Tamén consegue ser Campión Galego por quinta vez.

PRESENTACIÓN DA SEGUNDA EDICIÓN DO EVENTO DEPORTIVO “15K DEL ATLÁNTICO”

A carreira e a andaina 15k del Atlántico celébranse este domingo 5 de outubro percorrendo os concellos de Oia, O Rosal e A Guarda

O ESPECIALISTA DEFENSIVO ARKAITZ VARGAS FICHA POLO ACANOR ATLÉTICO NOVÁS

Na imaxe da presentación, Manolo “Campelo”, Moncho Vicente, Andrés Senra, Daniel Martínez, Arkaitz Vargas, Roberto Fernández e Modesto Augusto

ÉXITO TOTAL DA I EDICIÓN DA ANDAINA E CARREIRA “10K O ROSAL. FEIRA DO VIÑO”

Na imaxe, os gañadores absolutos da carreira 10k O Rosal Feira do Viño. No máis alto do pódium, Nuno Costa e Paula Mayobre. Más info neste enlace.

OS COORDINADORES DO 10K O ROSAL, ENTREVISTADOS NA RADIO MUNICIPAL DE TUI

Os rosaleiros Juan Ramón Martínez Barbosa, Óscar Vicente Rodríguez e Serafín Martínez Acevedo falaron da andaina e da carreira nos estudos da RMT

REPORTAXE FOTOGRÁFICA DA XIV ANDAINA “VAL DO ROSAL. O PARAÍSO DENDE AS ALTURAS”

Na imaxe, os participantes desta andaina, que visitaron o punto máis alto da vila, nos montes do Campo do Couto e os petroglifos próximos á Fonte do Home.

NOVA VITORIA DE GABRIEL MARCELLI CARBALLIDO NO CAMPIONATO DE ESPAÑA DE TRIAL

O piloto rosaleiro, imparable, é o favorito para facerse -por terceira vez- co Campionato de España de Trial. As próximas citas, Vila de Cruces e Andorra.

O ROSAL E O ATLÉTICO NOVÁS QUEREN FACER HISTORIA, por Juan Ramón Martínez Barbosa

Artigo do director de Noticias O Rosal, onde fala da Fase de Ascenso á División de Honor Prata do balonmán nacional que se celebra os días 2, 3 e 4 de maio

DEPORTISTAS E CLUBS, HOMENAXEADOS NO II RECOÑECEMENTO AO MÉRITO DEPORTIVO

O pasado sábado 12 de abril o Auditorio Municipal acolleu os premios aos mellores deportistas e clubs da vila. Na imaxe, autoridades e homenaxeados.

REPORTAXE FOTOGRÁFICA DA XIII ANDAINA O ROSAL. COÑECE O TEU CONCELLO

A vindeira andaina deportivo-cultural pola vila do Rosal celebrarase o vindeiro sábado 10 de maio, con saída dende o Alto da Portela (Marzán)

O 12 DE ABRIL CELÉBRASE O II ACTO DE RECOÑECEMENTO AO MÉRITO DEPORTIVO DO ROSAL

Na imaxe de 2011, na I edición, Gerardo Álvarez (ciclismo), Manolo Armán (balonmán) e Félix Piñel (atletismo) reciben os premios “Mención de Honra”.

ACTUACIÓN DO GRUPO ADREDDE NA FESTA DE ENTROIDO 2014 DE FORNELOS (O ROSAL)

O sábado 1 de marzo achegámonos ata Fornelos para ver en directo a animada actuación do Grupo Adredde e comprobar o ambientazo de Entroido

O LIBRO “MOLINOS” PRESÉNTASE EN PONTEVEDRA CON MENCIÓN ESPECIAL PARA O ROSAL

A nosa vila estivo representada polo alcalde, Jesús Mª Fernández Portela, así como por Tamuxe e Juan Ramón, autores do libro da historia dos Muíños do Folón-Picón

O ENTROIDO DE FORNELOS 2014, SERÁ, SEN DÚBIDA, DOS MÁIS ESPECTACULARES DA HISTORIA

Impresionante programa de Festas, con orquestras e grupos musicais, actuacións para nenos, Corrida do Galo, Frixidelas e como non, a 5ª edición da CARPA.

O ROSAL HOMENAXEA AO CICLISTA RAÚL FERNÁNDEZ, CAMPIÓN DE GALICIA E DE ESPAÑA

Na imaxe, Raúl Fernández na compaña dos seus compañeiros e directivos do Club Ciclista O Rosal, na recepción ofrecida no Concello.

RAÚL FERNÁNDEZ PROCLÁMASE EN CASTELLÓN CAMPIÓN DE ESPAÑA DE CICLOCROSS

Na imaxe, Raúl, flanqueado á esquerda polo exciclista profesional Serafín Martínez Acevedo e á dereita polo triatleta internacional, Óscar Vicente Rodríguez.

PROXIMAMENTE ANUNCIARASE A DATA DA II RUTA GUIADA ORGANIZADA POR NOTICIAS O ROSAL

A I Ruta Guiada Noticias O Rosal levou aos participantes a coñecer todos os segredos da ruta e historia dos emblemáticos Muíños do Folón e do Picón.

OS REIS MAGOS REPARTEN AGASALLOS A CENTOS DE NENOS/AS EN O ROSAL

Reportaxe fotográfica (máis de 300 imaxes) da visita e recepción na vila do Rosal de Melchor, Gaspar e Baltasar.

NOVO CONXUNTO DE GRAVADOS CRUCIFORMES NO LUGAR DAS CORTES

O historiador rosaleiro Xoán Martínez Tamuxe fala no seu blog deste achádego, recreación da cruz cristiá (séculos IV-V d. C.)

SERGIO RODRÍGUEZ, NETO DO CABAQUEIRO MANUEL "TRINTIÑA", INAUGURA “O BAR DO TRINTA"

Na imaxe, Serafín Martínez Acevedo (exciclista profesional e emprendedor deportivo), con Sergio (xerente do Bodegón-Tapería Os Seixiños. O Bar do Trinta).

TABAGÓN EN FESTAS (DÍAS 29, 30 E 31)

EN PROBAS

EN PROBAS

31 dic. 2010

Celebrouse o sorteo de Nadal de A.C.O.R.


A Asociación de Comerciantes do Rosal (A.C.O.R.) que preside José Martínez González (Pepe Berdeal) entregou na súa sede, os premios que ofertaba con motivo do Sorteo de Nadal deste ano 2010.



Na imaxe, Montse Silva Salceda, o seu marido Arturo Gómez Martínez e a súa filla, Ainoha, agasallados cunha cesta, na compaña do presidente de ACOR.

Relación de agasallos, premiados e comercios onde se entregaron os vales:
Vale de 300 €: Laurentina Martínez (Moda Sara Carrera)

Vale de 250 €: Gloria Martínez Álvarez (Perfumería Pili)

Vale de 200 €: Ana Cruz González (Mapfre)
Un xamón: Laudelina (Tele-Son)

Unha cesta: Elena Alonso Pereira (Calzados Antica)

Unha cesta: Montse Silva Salceda (Estanco O Rosal)
Vale de 150 €: Nieves Acosta Rocha (Restaurante Juan)

Vale de 75 €: Vicente Alonso (Tenda Paquín)

Vales de 50 €: Sabi González (Estanco O Rosal)

Remedios Rodríguez Álvarez (Cooperativa El Pilar)

Aurelia Coímbra Vidal (Confecciones Mary)

Vales de 20 €: Rosi Fernández Fernández (Calzados Antica)

Antonio R (Spa Esencial Nº 5)

Gustavo (Cooperativa El Pilar)

Celia Coímbra (Augaluz)

María Araújo (E&M)

Jorge Obispo (Ferretería O Calvario)

Flor de la Fuente (Moda Sacha)

Xurxo Lourenzo (Tenda Paquín)

Orlando Estévez (Electricidad O Rosal)

Loli González (Perfumería Pili)

Vales de 10 €: Eva Pacheco (Moda Sara Carrera)

Loli Costas (Activa Dixital)

Carmen Guerreiro (Confecciones Mary)

Natalia Santos (A Competencia)

Salud Rodríguez (Moda Sara Carrera)

Loli Iglesias (Confecciones Mary)

David Alonso (Tenda Paquín)

Lucindo (Alimentación Armán)

Javi Acevedo (Moda Sara Carrera)

Sofi Vázquez (Augaluz)

30 dic. 2010

Sevi e Dani, Campións de España de Futbolín


Os días 5, 6 e 7 de decembro celebrouse en Padrón (A Coruña) o “XIV Campeonato Nacional de Futbolín”.

Ata alí se desprazaron as mellores parellas de toda España para disputar este torneo en diferentes modalidades (combinada, parado, feminino e movemento).

O rosaleiro Carlos Álvarez Antúnez (Sevi) e o goianés Daniel Rodríguez Martínez –membros da futura asociación sociocultural baixomiñota “Os Cabaqueiros do Futbolín”- proclamáronse Campións de España desta última (movemento F-2) tras gañar na final aos cataláns Javier e Óscar.


Aproveitando a vitoria e o remate deste ano “futbolineiro” na nosa vila, foron recibidos e felicitados na casa consistorial polo alcalde rosaleiro Jesús Mª Fernández Portela e o concelleiro de Deportes, Ángel Martínez Villa.

Acompañaron aos Campións de España nesta recepción, ademais de familiares e amigos –entre outros- Sergio Casal Fernández (Yeya), vencedor con Luis Martínez Pereira, do I Campionato Os Cabaqueiros 2009 e Mary Domínguez Rodríguez, xunto con Ruth Mª Martínez, gañadora do I Campionato Feminino Noticias O Rosal 2010.



Tanto o Alcalde como o edil de Deportes mantiveron unha animada charla con Sevi e Dani e os demais xogadores e animáronos a seguir nesta liña, facendo mención ao primeiro torneo creado e organizado polo Concello o ano pasado (“Os Cabaqueiros”), que serviu como impulso para animar á xuventude e recuperar este xogo tradicional non só xa na vila do Rosal senón na comarca do Baixo Miño.

Rematou este acto cunha sesión fotográfica para a lembranza, cos campións e os seus respectivos trofeos, diante da Casa do Concello e tamén fronte ao “Daorde de Lurio” (monumento de pedra, obra de Pepe Antúnez Pousa, en homenaxe ao Cabaqueiro).

29 dic. 2010

César e Carmen, elixidos mellores praceiros 2010


César Santomé Lemos e Carmen Rodríguez Martínez foron elixidos “Mellores praceiros 2010” polos clientes da Praza de Abastos do Rosal dentro do programa “Este inverno presume de praceiro”, promovido pola Dirección Xeral de Comercio da Xunta de Galicia.



O concelleiro de Xuventude e Emprego do Rosal, Pablo Díaz Flores, xunto con Araceli del Pozo Galiñanes, Axente de Emprego e Desenvolvemento Local, foron os encargados de facerlle entrega aos praceiros dun pequeno agasallo e do correspondente diploma acreditativo.

27 dic. 2010

Premiados no I Torneo de Futbolín Bar Floro



Recentemente tivo lugar no Bar Floro (O Rosal) o acto de entrega de premios do I Torneo de Futbolín que leva o nome deste coñecido local da vila.

Esta competición, que tivo a colaboración de “Os Cabaqueiros do Futbolín”, foi disputada por 17 parellas (34 participantes), sendo gañada por Carlos Alberto Álvarez da Concepción e Marcos Casal Fernández que venceron a Rubén Santos Paz (Delio) e Carlos Álvarez Antúnez (Sevi) nunha apaixonante e reñida final que se decidiu na última bola.

O terceiro posto foi para Sergio Casal Fernández (Yeya) e Juan Ramón Martínez despois de gañar á parella formada por Sergio Rodríguez Álvarez e Ángel Martínez Diego.




A propietaria do local, Amparo Álvarez Rivero xunto coa súa irmá Delia, fixeron entrega dos trofeos e agasallos conmemorativos desta efeméride nun sinxelo pero animado acto.


Este torneo de futbolín “Bar Floro” 2010, tivo a novidade de que aparte do premio en metálico e das tradicionais copas tamén se obsequiou cunhas figuriñas realizadas a man, en exclusiva, para esta ocasión ás tres primeiras parellas clasificadas e de participación para todos os demais “futbolineiros/as”.

Destacar o bo ambiente e o compañeirismo reinantes durante todo o evento, así como a presenza de catro mulleres no campionato (Noelia Álvarez Baquero, Maite Martínez González, Mary Domínguez Rodríguez e Sonia Castro Rodríguez), que deron máis dunha sorpresa co seu crecente nivel de xogo e sobre todo ao eliminar da loita polos títulos a varios dos favoritos.

Fóra palabras como “competición e rivalidade”, este tipo de acontecementos (por que non, deportivos) son -sen dúbida- unha boa ocasión para rescatar do esquecemento a este vello xogo tradicional e desta maneira unir aínda máis á xuventude e aos “non tan mozos” e pasar unha xornada de convivencia realmente agradable.

Os “Cabaqueiros do Futbolín” queren agradecer publicamente o trato dispensado polas organizadoras do campionato e responsables do Bar Floro, Amparo e Delia, desexándolles unhas Felices Festas e animándoas a seguir con este tipo de loables iniciativas.

26 dic. 2010

Encontro de corais no Auditorio Municipal

O coro "Ecos do Folón", na súa presentación, hai xusto un ano (26 de decembro de 2009)

Hoxe, domingo 26 de decembro ás 19:00 horas terá lugar no Auditorio Municipal do Rosal o encontro de corais “Ecos de Nadal”, organizado polo Coro “Ecos do Folón” de Fornelos, coa colaboración do Concello, a Deputación Provincial e a Comunidade de Montes de Santa Mariña do Rosal.

Neste acto actuarán as seguintes corais:

CORAL DO CLUB DA TERCEIRA IDADE (A Guarda)
Director: D. Javier Domínguez Millán

CORAL POLIFÓNICA “VAGALUME” (Santa María de Oia)
Director: D. César Lorenzo Álvarez

CORAL POLIFÓNICA (A Guarda)
Directora: Dna. Marisilda Sánchez Lomba

CORO “ECOS DO FOLÓN” (Fornelos, O Rosal)
Director: D. Jorge Fernández González

22 dic. 2010

Manuel Martín Goyás gaña a Cesta de "O.C.D.F"



Manuel Martín Goyás, veciño da vila da Guarda, resultou ser o posuidor da rifa gañadora da Cesta, obsequio de “Os Cabaqueiros do Futbolín”, ao coincidir o seu número (250) coas tres últimas cifras do Primeiro Premio da Lotería de Nadal, que se celebrou onte mércores 22 de decembro. ¡Noraboa!

Os Cabaqueiros do Futbolín agradecen a todas aquelas persoas e entidades a súa colaboración nesta iniciativa e deséxanlles unhas ¡¡Felices Festas e un Bo Ano Novo 2011 cheo de saúde, paz, amor, cultura, unión e por suposto, moito, moito futbolín!!

17 dic. 2010

A Agrupación Musical recibe unha subvención



O venres 17 de decembro tivo lugar na Casa do Concello a entrega dunha subvención da Deputación de Pontevedra á Agrupación Musical do Rosal.

O alcalde da vila e á vez deputado provincial, Jesús Mª Fernández Portela, fixo entrega do cheque por valor de 4000 euros para renovación de vestiario á Agrupación Musical do Rosal, representada polo seu presidente, Jesús González Álvarez.

Contacontos na Biblio e visita de Papá Noel



O sábado 18 de decembro ás 12 da mañá terá lugar un novo contacontos na Biblioteca Municipal do Rosal, dentro do programa anual de fomento da lectura promovido pola concellaría de Cultura que dirixe Charo Tabales Perozo.

Así mesmo -aínda que se atopa moi ocupado nestas datas-  está confirmada a presenza de Papá Noel neste acto, onde pasará un rato agradable cos máis pequenos.

A Coral da A.M. do Rosal, nunha nova final



A CORAL DA AGRUPACIÓN MUSICAL DO ROSAL vén de clasificarse para a final da XLV edición de Vilancicos da Nova Caixa Galicia.

Esta coral, que conta con apenas 6 anos de andadura, está formada por 45 compoñentes e participará na final que se celebrará mañá, sábado 18 de decembro, en Vigo no Centro Cultural Caixanova, e o domingo 19 na Coruña, no Teatro Rosalía de Castro, xunto con outras 10 corais finalistas.

Interpretarán tres panxoliñas: Velo qué bonito, Con un sombreiro de palla e El tamborilero, as mesmas pezas que interpretaron o pasado 8 de decembro na súa actuación en Vigo.

Sen dúbida un gran broche para pechar este ano 2010. Dende Noticias O Rosal, a nosa noraboa e animámolos a seguir nesta liña, xa que así virán moitos máis éxitos. (Na imaxe, a coral en 2008, coa súa directora Toñi Santos Vaquero ao seu fronte)

14 dic. 2010

SORTEO DA ASOCIACIÓN DE COMERCIANTES (A.C.O.R.)


A Asociación de Comerciantes que preside José Martínez González (Pepe Berdeal) sortea multitude de premios con motivo das Festas de Nadal deste Ano Santo 2010:

1 vale de 300 €
1 vale de 250 €
1 vale de 200 €
1 vale de 150 €
1 vale de 75 €
3 vales de 50 €
10 vales de 20 €
10 vales de 10 €
2 cestas de produtos navideños
1 xamón

Dende A.C.O.R. desexan moita sorte a todos os consumidores e lembran que o sorteo celebrarase o mércores día 22 de decembro no seu local, na Fundación O Rosal.

Toni remata subcampión da Copa de España



"Non puido ser e Antonio Portela tivo que conformarse co 2º posto na Clasificación Xeral Final da Copa de España de Ciclocross categoría Cadete". Así comeza a web do Club Ciclista O Rosal a crónica do sucedido a pasada fin de semana na proba celebrada en Alcobendas (Madrid).

De todas formas, dende Noticias O Rosal dámoslles a nosa noraboa polo seu gran papel, tanto a Toni como ao club ciclista da vila que dirixe o seu activo e incansable presidente, Gerardo Álvarez Martínez. A bo seguro, coa humildade, ilusión e traballo que os caracteriza, acadarán moitos máis éxitos non xa a nivel rexional, senón -como se está demostrando- aínda no ámbito nacional. (Foto: Luz Iglesias)

13 dic. 2010

O Rosal, no VIII Congreso Internc. de Molinología

A concelleira de Turismo, Ángeles Vicente Manzano e a responsable de Cultura, Charo Tabales Perozo, representaron a O Rosal na reunión que se celebrou o sábado 11 de decembro no Edificio Área Panorámica de Tui, con motivo da organización do VIII Congreso Internacional de Molinología.

Unha vez aprobada a candidatura correspondente na Asemblea Xeral da “Asociación para la Conservación y Estudio de los Molinos” (ACEM) o día 21 de marzo, comezaron as primeiras accións para organizar dito congreso.

Baixo o lema Innovación e Ciencia no Patrimonio Etnográfico dende a ACEM e a Asociación Galega Amigos dos Muíños (ASGAMUI) cren que “é chegada a hora de que aqueles elementos que foron axudas valiosas para a realización de traballos vitais de moitos homes e mulleres que desenrolaron a súa vida no medio rural, teñan un merecido recoñecemento e un lugar nos tempos das novas tecnoloxías”.


Dentro do programa deste Congreso Internacional que se celebrará en Vigo no ano 2012, a vila do Rosal ten un destacado papel, xunto cos municipios de Meaño e a propia cidade olívica, xa que –por exemplo- os 67 muíños do Folón-Picón están considerados Ben de Interese Cultural pola Xunta de Galicia, sendo unha das visitas obrigadas para calquera investigador do tema ou aínda para os futuros congresistas.

Así mesmo esta cita conta coa colaboración de diferentes entidades, entre outras, as Universidades de Vigo, Santiago de Compostela e A Coruña, e tamén da Deputación de Pontevedra e Caixanova.

Este congreso servirá “para seguir potenciando os estudos etnográficos elevándoos á categoría de Ciencia baseándose nos coñecementos empíricos daqueles que inventaron enxeños e mecanismos máis ou menos complicados para un mellor desenrolo da súa vida cotiá. Nada mellor que un foro internacional no que se dan cita gran número de expertos e investigadores no eido da muiñoloxía e dos enxeños hidráulicos ou eólicos para conquerir que os grandes esforzos físicos e intelectuais dos que nos precederon non se vexan esquecidos e afastados nos recunchos do inservible”.

Lembramos que O Rosal conta dende o pasado 2009 precisamente cun completo estudo editado pola Deputación de Pontevedra sobre os seus elementos hidráulicos máis famosos: Os muíños do Folón e do Picón na vila do Rosal. Conxunto histórico-etnográfico de Galicia, obra dos escritores rosaleiros Xoán Martínez Tamuxe e Juan Ramón Martínez Barbosa.


Deixar de fumar en Érguete Baixo Miño



Despois desta recente subida no prezo do tabaco, sobre 40 céntimos por paquete de cigarros equiparándose ao prezo en Portugal pero aínda moi lonxe de países como Reino Unido, Francia ou Alemaña, e tendo en conta a nova Lei que entrará en vigor a primeiros de ano onde se prohibe fumar en todos os espazos públicos pechados, a Asociación Érguete Baixo Miño de Prevención das Drogodependencias, Educación e Promoción da Saúde oferta un “CURSO DE DESHABITUACIÓN TABÁQUICA” dirixido a todas aquelas persoas que desexen deixar de fumar.

Este curso terá lugar na sede desta entidade sita na r/Colón, 20 (Edif. O Pescador 1º piso) de A Guarda e será impartido por unha psicóloga da Asociación Española contra o Cancro, baixo o apoio dunha médica.

Trátase dun curso gratuíto e que pretende axudar a todas as persoas que desexen romper co tabaco a través de terapia psicolóxica individual e grupal.

Para máis información desta actividade, dirixirse ao local da Asociación (rúa Colón, 20 – Edif. O Pescador; A Guarda), no teléfono 986 614 407 ou solicitándoa vía e-mail: info@erguete.org

A I Cea-Megafesta do Futbolín, un éxito



O venres 26 de novembro celebrouse no Restaurante Juan (O Rosal) a I Gran Cea-Baile. Megafesta do Futbolín 2010.

O evento, organizado polo grupo -e futura asociación- “Os Cabaqueiros do Futbolín” (que pronto estará na Rede), reuniu a mozos e mozas amantes deste xogo tradicional, que grazas ao Concello do Rosal está poñéndose de novo de moda non só na propia vila, senón na mesma Comarca do Baixo Miño.



Todo comezou en outubro do pasado ano 2009 coa instauración do I Campionato de Futbolín “Os Cabaqueiros” en lembranza e homenaxe dos vellos mestres telleiros da zona. Este primeiro torneo, creado como unha actividade de ocio enfocada á xuventude, foi finalmente gañado pola parella formada por Sergio (Yeya) Casal Fernández e Luis Martínez Pereira.

Colaboraron co Concello nesa primeira edición, dous locais (Pub J&J e Bar Troya), así como a Fundación O Rosal e Caixanova.

Xa no presente 2010 nace o I Campionato Feminino Noticias O Rosal -exclusivamente para mulleres- que crea esta web cultural, sendo unha iniciativa pioneira a nivel rexional e aínda nacional. As vencedoras foron as rosaleiras Mary Domínguez Rodríguez e Ruth María Martínez.

Despois de varias competicións en distintos bares e cafeterías do municipio, o pasado outubro, e de novo na Festa do Cabaqueiro, celebrouse o II Campionato de Futbolín -que gañaron Diego Martínez Alonso e Diego Álvarez Fernández-, confirmándose este certame como un dos eventos de ocio máis atractivos e agardados do ano no Baixo Miño.

Nesta ocasión, e debido ao éxito do 2009, contouse coa colaboración de máis locais (Cafetería Skape 34, Bar Floro e Bar A Cantina), ou mesmo coa cooperación do mencionado grupo “Os Cabaqueiros do Futbolín”, que naceron precisamente logo da axuda e apoio prestado na organización daquel torneo feminino.

Asistiron pois a esta I Gran Cea-Baile. Megafesta do Futbolín –entre outros- Jesús Mª Fernández Portela, alcalde do Rosal; Pablo Díaz Flores, concelleiro de Xuventude, Ángel Martínez Villa, edil de Deportes e Mª Carmen Alonso, responsable do Departamento de Servizos Sociais e Muller.

O acto contou tamén coa presenza e apoio de dous recoñecidos deportistas da vila, o ciclista Serafín Martínez Acevedo e o triatleta Óscar Vicente Rodríguez.

Así mesmo destacar a participación de José Martínez González (Pepe Berdeal), presidente da Asociación de Comerciantes do Rosal e Iván Diego Martínez, representante da Agrupación Musical da vila, que tiveron –como se pode observar nas imaxes- un protagonismo especial nesa cea.

Juan González Domínguez e Rafael Martínez López, membros da Fundación O Rosal non dubidaron tamén en respaldar este acontecemento para os rapaces e rapazas da Comarca.

A Organización (“Os Cabaqueiros do Futbolín”) realizou varios sorteos durante a cea. Desta maneira, Daniel Martínez González foi agraciado cun “Percorrido Marino” para dúas persoas no Talaso Atlántico de Baiona e Rebeca Rodríguez Rodríguez gañou unha rosca de xema de Confitería Rogelio.

Igualmente entregáronse diversos diplomas, premios e agasallos ás entidades, locais e particulares que colaboraron nos dous campionatos máis importantes da vila (Cabaqueiros e Feminino) así como aos gañadores do I Campionato de PlayStation Fifa 11 que O.C.F. levara a cabo na XXIII Festa do Cabaqueiro:

1º clasificado: Diego Martínez Alonso

2º clasificado: Pablo Martínez Alonso

3º clasificado: Carlos Daniel Díaz Pereira

Harmonizou a velada o cuarteto “3+1” da Agrupación Musical do Rosal, cuxos integrantes a pesares de ter unha dilatada experiencia como músicos da banda, fixeron o seu debut diante do público, xa como grupo. O resultado non puido ser mellor, xa que ofreceron espectáculo a raudais e foron moi aplaudidos, tocando aínda con varios “espontáneos” de luxo, entre eles Pepe Berdeal e Jonathan Martínez Rodríguez.

Unha vez rematada a actuación de 3+1, foi a quenda de Dj Curry, quen coa súa animada sesión, misturando temas de onte, de sempre, e a música máis actual, puxo o broche final a esta I Megafesta.

Os Cabaqueiros do Futbolín queren agradecer en especial, a colaboración nesta ocasión, do propio Restaurante Juan así como de Daniel Rodríguez Martínez e Antonio Lomba Rodríguez (Xián) pola cesión dos seus futbolíns. Asemade, agardan e animan a que este “vicio” ou “enfermidade” que é para moitos/as o xogo do futbolín, se siga estendendo e contaxiando entre os rapaces e rapazas da zona. Sen dúbida, este tipo de actos é unha boa escusa para xuntarse todo o mundo e pasalo realmente ben.

10 dic. 2010

Día 12. Os Campelos: "Non hai dous sen tres"


Por terceiro ano consecutivo, o popular dúo humorístico rosaleiro “Os Campelos” (Francisco Rodríguez Fernández e Roberto Fernández Rodríguez), actuarán nestas datas de Nadal no Auditorio Municipal.

O evento, que está organizado polo Concello do Rosal, celebrarase o domingo 12 de decembro, ás 18:00 horas, precisamente baixo o título: “Non hai dous sen tres…”

No caso de completar o aforo -que é de 342 persoas- habería unha segunda función ás 20:00 horas. (Na imaxe de Silvia Rodríguez, Os Campelos con David Amor, nun momento da divertida función de 2009).



A Praza de Abastos acolle un novo sorteo



O pasado martes 7 de decembro a Praza de Abastos do Rosal acolleu o segundo sorteo dos tres cheques de compra por valor de 75, 50 e 25 euros, dentro do programa “Este inverno, presume de praceiro” que promove a Xunta de Galicia.



Novamente, procedeuse á extracción dos números premiados ante a presenza –entre outros- dos propios praceiros, membros da Dirección Xeral de Comercio e os concelleiros Pablo Flores Díaz (Xuventude e Emprego), Ángel Martínez Villa (Deportes) e Charo Tabales Perozo (Cultura).


Desta vez as clientes afortunadas foron as seguintes:

Isabel Loureiro – 75 euros

Mª del Pilar Alonso Rodríguez – 50 euros

Patricia Comesaña Pérez – 25 euros

7 dic. 2010

O mago Javier Muro actuou no Polivalente



O sábado 4 de decembro tivo lugar no Centro Social Polivalente un espectáculo de maxia a cargo de Javier Muro, mago profesional.



Esta actividade estivo organizada pola A.N.P.A. das escolas rurais do Rosal, CRA. Mª Zambrano. (Fotos: A.N.P.A.) 

5 dic. 2010

Partido amistoso entre o Ribera e o R.C. Celta



O mércores 8 de decembro ás 11 horas terá lugar no Estadio Municipal de A Mata un gran partido de fútbol “amistoso” entre o Ribera (xuvenil) e o Real Club Celta de Vigo (cadetes División de Honor).

Os pupilos de Juanma Berrecoso van primeiros no grupo 9º da Segunda Autonómica, mentres que o Celta tamén é líder na súa categoría por diante do Deportivo da Coruña, con once partidos disputados, nove deles gañados, un empate e unha derrota, con 31 goles a favor e tan só 6 en contra.

Dende o club rosaleiro animan a asistir a este interesante encontro e anuncian ademais que a entrada será gratuíta, celebrándose ao descanso varios sorteos (unha cea, camiseta do R.C. Celta e lotes de viño).

1 dic. 2010

O Rosal estará no I Torneo de Carregal



Esta mesma fin de semana, en concreto o SÁBADO 4 DE DECEMBRO, a partir das 16:00 horas, celebrarase o "I CAMPEONATO DE FUTBOLÍN EN CARREGAL" (Tomiño). A inscrición, tamén 10 € por persoa. Xa está confirmada a asistencia de polo menos unha parella representante do Rosal. Para anotarse, en "Novo Bar Carregal" ou chamando ao teléfono 649156972 (a partir das 19 horas). Os premios son os seguintes:

1º PREMIO: CEA EN WOODY POOL + 200 EUROS
2º PREMIO: CEA EN WOODY POOL + 100 EUROS
3º PREMIO: CEA EN WOODY POOL + DÚAS BOTELLAS DE WHISKY

Venres 3, o I Torneo de Futbolín Bar Floro



Este VENRES 3 DE DECEMBRO, I TORNEO DE FUTBOLÍN BAR FLORO (O ROSAL). Mañá, XOVES ás 21:00 horas, nese local terá lugar a REUNIÓN-PRESENTACIÓN-SORTEO do campionato (ten que asistir polo menos o capitán de cada equipo). A inscrición (10 € persoa) poderá facerse nese mesmo acto. Haberá ¡¡GRANDES PREMIOS!!

Comunicado de Érguete Baixo Miño. Día da SIDA



NON AO PECHE DAS CASAS DE ACOLLIDA PARA AFECTADOS/AS DE VIH/SIDA DE GALICIA

No Día Mundial do VIH/Sida, o 1 de decembro, a Asociación ÉRGUETE BAIXO MIÑO anima á participación cidadá amosando apoio á situación que viven algunhas das persoas afectadas por esta enfermidade na nosa comunidade. Son 15 as persoas que directamente quedan na rúa no mes de decembro (enfermos sen familia e sen ningún tipo de axuda).

Lembra tamén, que dende esta entidade, cóntase cun Servizo Gratuíto de Información e de Asesoramento de VIH/Sida así como de Facilitación de Preservativos e de Xiringas de xeito permanente durante todo o ano.
Enviade os vosos apoios a:
Consellería de Traballo e Benestar
Beatriz Mato Otero

Presidencia do Goberno Galego

25 nov. 2010

Xavi Díaz, líder da División de Honor B


O rosaleiro Xavi Díaz, porteiro profesional de balonmán, actualmente no Octavio Pilotes Posada de Vigo, é líder co seu equipo, da División de Honor B.

O Balonmano Huesca, segundo clasificado e a tan só un punto dos galegos, declarará "Día de ayuda al club" o enfrontamento deste sábado fronte ao Pilotes.

Segundo afirma Xavi "se perdemos, non pasa nada. Entre outras cousas porque Huesca aínda ten que pasar por Vigo. Iso si, se gañamos, moito mellor". (Foto: Carlos Pereira)

O Atlántico Diario entrevista a David



O noso decatleta biolímpico David Gómez Martínez, concedeu esta semana unha pequena entrevista a Santi Alonso, do xornal Atlántico Diario. Nela cóntanos como está adestrando a xoves deportistas mentras non se recupera da súa operación nos tendóns de Aquiles. (Foto: R.C. Celta)

O Rosal. I Gran Cea-Baile. Megafesta do Futbolín


O venres 26 de novembro terá lugar no Rosal a I Gran Cea-Baile. Megafesta do Futbolín 2010, que organizada polo grupo informal (e futura asociación) "Os Cabaqueiros do Futbolín", se celebrará no Restaurante Juan.

Segundo o cartel do evento, unha boa cea presidirá a velada, que estará animada polo Grupo 3+1 da Agrupación Musical do Rosal.

Os Cabaqueiros do Futbolín afirman que nas instalacións deste coñecido restaurante rosaleiro estarán dispoñibles gratuitamente varias mesas deste xogo para quen desexe botar unhas partidiñas. 

Este acto de ocio e sociocultural acollerá a presentación dunha nova páxina web así como a entrega de diferentes premios e moitas sorpresas.

Segundo a Organización pode asistir quen queira, previa inscrición e pago de 25 euros no propio Restaurante Juan (tfno: 986 62 50 85) ou no Pub J&J, ambos situados na rúa Couso (en fronte do Auditorio Municipal).

Colaboran nesta I Gran Cea-Baile. Megafesta do Futbolín 2010, o Concello do Rosal, a Agrupación Musical e a nosa web.

Sen dúbida este evento será o colofón final para un ano no que O Rosal converteuse cos seus campionatos de futbolín (II dos Cabaqueiros, I Feminino Noticias O Rosal, e de diversos locais) no referente e impulsor de novo deste "deporte" no Baixo Miño e aínda en Pontevedra.

Benito Guerreiro, sairá en Actualizad@s, da TVG


Benito, cruzando a Serra dos Ancares, durante a súa volta a Galicia

Segundo nota de prensa remitida á redacción de Noticias O Rosal polo equipo de produción de Avoltascoscontos, o sábado 27 de novembro ás 22:00 horas, “Benito, o protagonista da nosa aventura estará presente no programa Actualizad@s da TVG nun monográfico titulado A pedais”.

 
Actualizad@s é un espazo divulgativo que reflicte a realidade variada de Galicia a través da vida cotiá de galegos e galegas (de toda idade e condición) que teñen cousas que contar. Este programa afonda nos contidos xornalísticos á procura de cidadáns anónimos que aproveitan a súa existencia con paixón nos ámbitos cotiáns en que se desenvolven. Un equipo de cinco reporteiros varre Galicia na procura desas historias anónimas marabillosas, que transcorren á marxe dos focos da "actualidade", e constitúen un retablo singular deses "heroes locais da vida cotiá" dos que falaba Torrente Ballester”.


Está claro que Benito Guerreiro encaixa á perfección na filosofía deste programa e, polo tanto, non podía faltar. No programa do vindeiro 27 de novembro serán varios protagonistas os que estean presentes: o movemento cívico "Masa Crítica", un rapaz totalmente entregado a ser ciclista profesional, un grupo de vellos da Terra Cha que non baixan da bici para calquera dos seus desprazamentos, un tándem paraolímpico con cego, un profesor de 60 anos que tampouco baixa da bici e Benito Guerreiro, que na primaveira-verán do ano 2007 recorreu en bicicleta todos os concellos de Galicia nunha apaixonante viaxe de 72 días e case 6.000 km en solitario.

 
A reportaxe na que sairá Benito Guerreiro foi rodada o pasado 3 de novembro. A gravación comezou a media mañá coa proxección do documental Anacos… a un grupo de alumnos do Colexio Manuel Suárez Marquier de O Rosal.

A proxección de Anacos… baseada na aventura en bicicleta que Benito Guerreiro fixo no ano 2007 foi o momento máis emotivo da xornada e espertou as risas e a curiosidade dos pequenos.

A rodaxe continuou ao largo de todo o día en diversos recunchos do antigo Concello da Foz do Miño, na actualidade, concellos de A Guarda e O Rosal.

Durante o documental, Benito compartirá con nós as súas reflexións e os momentos máis inesquecibles da súa viaxe por Galicia, finalizando a súa intervención asucando as augas do Pai Miño na súa planeadora, facendo unha pequena introdución do que será o seu novo proxecto.

Outra das protagonistas será Lola, a nai de Benito, que tamén estivo presente na rodaxe comentando que significou para a familia a aventura da Volta a Galicia en bicicleta e nos contará, como non podía ser doutra forma, a súa relación coas bicicletas dende a infancia.

Porque a “bici”, para moita xente, é unha filosofía de vida; poderemos comprobalo, como dixemos, o sábado 27 de novembro ás 10 da noite na TVG no programa Actualizad@s no seu monográfico “A Pedais”.

24 nov. 2010

Sorteáronse na Praza de Abastos os tres cheques


O luns 22 de novembro tivo lugar na Praza de Abastos do Rosal o primeiro sorteo dos tres cheques de compra por valor de 75, 50 e 25 euros, dentro do programa “Este inverno, presume de praceiro” que promove a Xunta de Galicia.


Entre os días 8 de novembro e o 4 de decembro os clientes dos mercados municipais galegos recibirán un cupón por cada acto de compra. No Rosal cada persoa xa o encheu co seu nome, apelidos e teléfono de contacto, indicando o nome do seu praceiro favorito e depositando o cupón nunha urna instalada no propio mercado.

Membros da Dirección Xeral de Comercio procederon ao sorteo dos tres cupóns na presenza –entre outros- dalgúns dos propios praceiros, de Pablo Flores Díaz, concelleiro de Xuventude e Emprego; Araceli del Pozo Galiñanes, Axente de Emprego e Desenvolvemento Local; Ana Pérez Otero, conserxe do Centro Social Polivalente e Juan Ramón Martínez, representante do Departamento de Cultura.

Os clientes agraciados -que nos cupóns elixiron a César Santomé Lemos (2 votos) e a Carmen Rodríguez Martínez como praceiros favoritos- foron os seguintes:

Marisa Martínez – 75 euros
Laura Mª González Rodríguez – 50 euros
Isaac Vicente Martínez – 25 euros

O vindeiro sorteo celebrarase o martes 7 de decembro novamente na Praza de Abastos da vila.

23 nov. 2010

Actuación do grupo de teatro Agarimo de Vigo


O sábado 20 de novembro tiveron lugar no Auditorio Municipal do Rosal diversos actos con motivo do Día Internacional para a Loita contra a Violencia de Xénero.

O grupo Agarimo (Asociación de Amas de Casa y Consumo) de Vigo, representou a obra "A Pousadeira" de Carlo Goldoni, baixo a dirección de Alejandra Abreu.


Antes, a concelleira de Servizos Sociais, Mª Carmen Alonso Alonso leu este pequeno manifesto:

"Como cada ano ao chegar estas datas próximas ao 25 de novembro, Día Internacional para a Loita contra a Violencia de Xénero, facemos balance do que queda por facer: seguir traballando e xuntar forzas para combater e acabar contra este terrible fenómeno.

Un ano máis denunciamos dende o noso concello, a Violencia de Xénero. Por suposto a violencia que termina co fin da vida de moitas mulleres... pero tamén queremos que este manifesto sirva de protesta aos berros, abusos, acosos, insultos, violacións ás que son sometidas, e que moitas veces silenciamos.

Sumámonos a todos os manifestos que nestes días serán lidos en todas as partes do mundo en contra da Violencia de Xénero".

A seguir, e minutos previos á baixada do telón, a concelleira de Turismo, Ángeles Vicente Manzano deu lectura a un poema da autoría do Xuíz de Paz da vila, Cástor Rodríguez González:

POR SER MUJER

Con tristeza se invade el alma de dolor
cuando en flor marchitan la existencia
de una vida noble, resignada, agradecida,
con el hacha cruel de un celo homicida.

La sinrazón de la fuerza establecida
a cambio del honor del cariño
con instinto brutal se hace dueña
de forma irracional y muy maldita.

Por ser mujer naciste de madre para madre,
criste a tus hijos con insomnio y padecer
llevaste los cuidados generosos de la casa,
fiel y abnegada te volviste en el amor,
diste ternura al poder del otro ser.

Por ser mujer das cariño a este mundo
que muchas veces no es agradecido
al ofrecerte la maldad por compañero
que por la ira y la violencia es conocido.

No es justo que alguien discrimine
y quiera dominar a su capricho
a quien le puede enseñar a compartir
lo que es bueno y de humano exquisito.

A ti, que eres hombre y caballero,
te dieron compañera y no sierva
para que aprendas en amor a convivir
y desprecies la ira y la violencia
contra quien no ofrece resistencia,
por ser mujer.

Homenaxe da U.D. Ribera a Fuentes e Villita



O pasado domingo 14 de novembro o club de fútbol U.D. Ribera homenaxeou a dous dos xogadores máis importantes da súa historia, Manuel Coballes “Fuentes” e Celso “Villa” Ferreira, ambos os dous rosaleiros, que chegaron a competir na Segunda División nacional.

Con motivo dos actos de inauguración do novo Estadio Municipal da Mata, Fuentes e Villita -arroupados en todo momento polo secretario do club, Manuel Iglesias Dorado- foron os encargados de realizar o saque de honra antes do comezo do partido que enfrontou ao conxunto local co de Arbo.

Lembramos que Manuel Coballes Fuentes naceu no barrio de Cruceiro (San Miguel de Tabagón) o 26 de xaneiro de 1933. Comezou a xogar na U.D. Ribera con 16 anos e xa en 1952 ficha polo Real Club Celta de Vigo, onde estivo cedido ao seu filial Celta Casablanca, baixo as ordes do popular adestrador Yayo. Neste equipo tivo unha grave lesión de xeonllo, que o retirou dos terreos durante un ano e puxo freo ás súas aspiracións máis inmediatas. Foi operado en primeira instancia polo médico celeste Dr. Díaz Mella e máis tarde, polo ilustre galeno do Atlético de Madrid, Dr. Garaizabal.

Durante a “mili” xogou no Tauste, equipo maño da Terceira división, estando a proba no Real Zaragoza, na Leonesa, no Avilés e aínda no Valladolid.

Fuentes, que chegou a disputar a 2ª División no R.C. Celta e no Racing de Ferrol, tivo que retirarse aos 28 anos en 1961. Posteriormente foi adestrador da U.D. Ribera ou mesmo do Sporting Guardés.

Pola súa banda, Celso Villa Ferreira naceu en O Cotro, parroquia de San Miguel de Tabagón, o 18 de febreiro de 1940. Xa aos 14 anos xogaba cos maiores da U.D. Ribera. Aos 18 anos forma parte da Selección de Xuvenís de Galicia e ficha polo Zeltia, da Terceira División. Despois dunha gran temporada o C.D. Ourense, da 2ª División fíxase nel e incorpórao ao seu equipo, pasando aquí seis temporadas como titular (1959-1966), reforzando en ocasións, ao Sporting Guardés.

Na temporada 1966-67 ficha polo Real Valladolid, tamén de Segunda e máis tarde polo Xerez e polo Real Jaén.

En 1972 decide cambiar de aires e o Famalicao portugués de 2ª División faise cos seus servizos, aquí pasaría tres temporadas. De 1974 a 1976 pechou a súa carreira futbolística, como profesional, xogando no Río Pele, tamén da Segunda lusa e que nesa última temporada ascendeu, pero Villita xa decidira colgar as botas, para ese mesmo ano adestrar ao Sporting Guardés.





Actos de Cruz Roja Juventud para o 25 N


Un lazo na fachada da Casa do Concello do Rosal lembra este Día

Cruz Roja Juventud conmemora o 25 de novembro o Día Internacional para a Eliminación da Violencia contra a Muller baixo o lema: "Ni héroes, ni heroínas, ni príncipes azules en la lucha contra la violencia te necesitamos a ti, ¡POSICIÓNATE!”.

Reproducimos aquí literalmente a nota de prensa enviada á nosa redacción:

"Para acabar con la violencia de género Cruz Roja entiende que es fundamental empezar desde el colegio, promoviendo la igualdad entre hombres y mujeres para buscar una sociedad donde no se discrimine por razón de sexo, identidad, raza o cultura y sensibilizando mediante la educación.

Con este objetivo de educar en igualdad, sensibilizar y promover la reflexión entre la sociedad, Cruz Roja Juventud pone en marcha una campaña con motivo, el 25 de noviembre, del Día Internacional para la Eliminación de la Violencia contra la Mujer, bajo el lema "Ni héroes, ni heroínas, ni príncipes azules en la lucha contra la violencia te necesitamos a ti, ¡POSICIÓNATE” se dirige a niños, niñas y jóvenes de entre 5 y 12 años, para promover entre los más jóvenes modelos de relación que no generen violencia hacia las mujeres.

En esta ocasión, se han preparado dos actividades que se desarrollarán en los talleres de mediación Social y manualidades de A Guarda los días 26 y 29 de noviembre, además de repartir lazos violetas en estas actividades y para todas aquellas personas que se acerquen por la asamblea. Para difundir el mensaje del propio 25 de noviembre: Día Internacional para la Eliminación de la Violencia contra las Mujeres.

Cruz Roja en Pontevedra desarrolla el Programa Sen Violencia-Convivencia que, en convenio con la Diputación Provincial, trabaja la coeducación y la prevención de la violencia de género entre otros temas, a lo largo de todo el año. Sólo durante este año 2010 se ha trabajado con más de 1.000 personas entre chicas y chicos, niñas y niños, personal docente y familias.

Cruz Roja Española tiene un compromiso con las mujeres que sufren violencia de género, uno de los colectivos más vulnerables, y con la sociedad en su conjunto, para contribuir a erradicar este tipo de violencia. La organización tiene programas para dar una respuesta integral, que va de la prevención, educación y sensibilización, a la atención a mujeres víctimas de violencia.

Los proyectos de Cruz Roja responden a las necesidades de estas mujeres con apoyo psicológico y social, a través de iniciativas como los programas de apoyo y atención o el servicio de teleasistencia móvil".

21 nov. 2010

Toni, líder da Copa de España de Ciclocross



Segundo se publica na web do Club Ciclista O Rosal, TONI PORTELA venceu onte domingo en Navia (Asturias) e ademais enfúndase o maillot de LÍDER da COPA DE ESPAÑA de CICLOCROSS. ¡A nosa noraboa! (Foto: Luz Iglesias)

19 nov. 2010

Presentouse o novidoso proxecto "Repoblar"




O mércores 17 de novembro tivo lugar no Auditorio Municipal da vila a presentación da Rede Pontevedra Banda Larga Rural "Repoblar". Trátase da rede sen fíos que a Deputación de Pontevedra está a despregar na provincia, a través do proxecto Wimax Rural Pontevedra, cofinanciado nun 70% por fondos FEDER dentro do eixo 5 "Desenvolvemento local e urbano sostible" do P.O. FEDER.


Deu a benvida aos asistentes o alcalde, Jesús Mª Fernández Portela, quen estivo acompañado na mesa presidencial pola concelleira de Educación, Mabel Franco Pérez, ademais de Charo Tabales Perozo, Ángeles Vicente Manzano e Mª Carmen Alonso Alonso, responsables respectivamente dos departamentos de Cultura, Turismo e Servizos Sociais.





O acto contou coa presenza e apoio de José Collazo, informático municipal, diferentes traballadores, técnicos e funcionarios do Concello, así como do presidente da Asociación de Comerciantes do Rosal, José Martínez González, o presidente da Agrupación Musical, Jesús González Álvarez e o presidente do Grupo Filatélico e Numismático Val do Rosal, Alfonso Dorado Senra.
 

O Xefe do Servizo de Novas Tecnoloxías da Deputación de Pontevedra, Amancio Varela García foi o encargado de presentar esta rede de última xeración “que pretende rachar coa brecha dixital na provincia de Pontevedra, supoñendo un antes e un despois na nosa provincia e nas súas comarcas, dándolle novos atractivos ao rural e ofrecéndolles aos seus cidadáns as mesmas oportunidades”.

Varela García afirmou que “os veciños do concello do Rosal, vivades onde vivades, ides poder ter nas vosas casas acceso a Internet de Banda Larga antes de rematar o ano 2010 por só 17 €”.

A Deputación adxudicoulle a Iberbanda o despregue desta rede, a cal, a través da súa marca tngo comercializa os distintos servizos, tanto de Internet como de telefonía.

Repoblar ofrece tarifa plana, sen compromiso de permanencia e coa instalación incluída na cota de alta (59 €). Sen necesidade de liña tradicional e ata 300 minutos de chamadas a teléfonos fixos nacionais por 6 euros ao mes.

Lembrou Amancio Varela que para poder gozar de conexión sen fíos de banda larga a Internet con esta rede de Repoblar é necesario seguir un sinxelo proceso: mediante contratación telefónica, chamando de xeito gratuíto ao 1632 ou por contratación online, a través da web de repoblar (www.repoblar.depo.es) ou da web de tngo (www.tngo.es)  

17 nov. 2010

I TORNEO DE FUTBOLÍN BAR FLORO. INSCRICIÓN ABERTA



O Rosal, que está poñendo de moda na comarca do Baixo Miño este vello xogo tradicional, acollerá en vindeiras datas un novo campionato de futbolín.

Organiza: Bar Floro

Colabora: A Peña do Futbolín

Data: por confirmar.

Inscrición: 10 € persoa (20 € a parella)

Podedes recoller dende xa no propio local a folla para inscribirvos.

Haberá premios e agasallos para todos os/as participantes...

¡Animádevos!

Presentación da Rede Repoblar no Auditorio

Hoxe, mércores 17 de novembro, terá lugar ás 19:30 horas no Auditorio Municipal a presentación da Rede Pontevedra Banda Larga Rural "Repoblar".

Trátase da rede sen fíos que a Deputación de Pontevedra está a despregar na provincia, a través do proxecto Wimax Rural Pontevedra, cofinanciado nun 70% por fondos FEDER dentro do eixo 5 "Desenvolvemento local e urbano sostible" do P.O. FEDER 2007-2013. Máis información en http://www.concellodorosal.es/ ou en http://www.repoblar.depo.es/ 

16 nov. 2010

Inauguración do novo Estadio Municipal



O sábado 13 de novembro tivo lugar baixo unha fina pero continua choiva a inauguración das obras efectuadas no novo e flamante Estadio Municipal da Mata.

Asistiron ao evento –entre outras autoridades- o conselleiro de Medio Ambiente, Territorio e Infraestruturas, Agustín Hernández Fernández; o presidente da Deputación de Pontevedra, Rafael Louzán Abal; o secretario xeral para o Deporte da Xunta de Galicia, José Ramón Lete Lasa; e o deputado provincial de Deportes, José Enrique Sotelo.

Igualmente acompañando ao alcalde Jesús Mª Fernández Portela, estivo presente a Corporación Municipal en pleno, así como presidentes e membros das distintas asociacións socioculturais da vila e da comarca do Baixo Miño.



Ata O Rosal achegáronse personalidades e representantes do mundo do deporte galego, como Isidoro Hornillos Baz, presidente da Federación Galega de Atletismo; o seu vicepresidente 1º, Eleuterio García Rodríguez ou o delegado en Vigo da Federación Galega de Fútbol, Enrique González Güenaga.

A esta inauguración asistiron tamén os deportistas rosaleiros David Gómez Martínez, atleta; Serafín Martínez Acevedo, ciclista; Óscar Vicente Rodríguez, triatleta e o xove nadador, Diego Fernández González. Así mesmo, destacar a presenza de Félix Piñel Alonso, incombustible mestre de Educación Física do CPI Manuel Suárez Marquier e impulsor dende fai moitos anos do atletismo na vila, que se encargou de organizar unha carreira previa ao comezo dos actos.

Antigos e actuais directivos da U.D. Ribera, comandados polo seu presidente José Manuel Álvarez Barredo, estiveron ben atentos a toda a cerimonia. Mención especial mereceron os centos de futbolistas que pasaron polo equipo rosaleiro, e entre eles, Fuentes e Villita, que chegaron a xogar na Segunda División nacional.

Bendiciu as instalacións o crego Isaac Penela Carbajales, quen pronunciou unhas solemnes palabras a modo de pequeno discurso para a ocasión.

A seguir, tiveron lugar as diferentes intervencións das autoridades, que alabaron as obras de mellora levadas a cabo na Mata, desexando unha longa vida ás instalacións. Igualmente lembraron a importancia da implicación dos seus usuarios para a súa correcta utilización e posterior mantemento.

Finalizou este histórico acto coa firma do libro de honra e dun balón de fútbol, así como coas fotografías das diferentes categorías da U.D. Ribera, que alegres e conscientes da importancia do evento, pousaron para os múltiples medios de comunicación que se deron cita na nosa vila.

Impartirase un curso de arte floral de Nadal

A Asociación Mulleres en Igualdade do Rosal organiza a partir do 25 de novembro un curso de arte floral con motivo das Festas do Nadal. Éste será impartido por Marisol (Floristería Augaluz) e constará de catro clases que se celebrarán os xoves de 20 a 22 horas.

O prezo do curso é de 25 euros e hai prazas limitadas. Para anotarse, nos teléfonos 696 865 315 e 677 431 318.