Canto de berce para Cibrán, arrolo da autoría de Berta Castro González

Arrolos ou Cantos de Berce, por Berta Castro González.

Todos/as sabemos que a música é unha linguaxe universal pola cal a través dela podemos expresar sensacións coma a ledicia, tristura, angustia, morriña, liberdade, desafogo… Cando cantamos expresámonos e comunicamos ó oínte aquilo que lle pretendemos transmitir.

Os cantos de berce ou arrolos son unha maneira de expresarlle ós nosos fillos/as amor á través do canto. O seu ritmo suave e melodía relaxante sérvenos para tranquilizar, arrolar e axudar a durmir ós nosos bebés.

Na actualidade son moitos os xoguetes musicais dos que están rodeados os nosos fillos co fin de estimulalos, relaxalos ou axudalos a durmir… pero o son que máis chama a atención dos bebés é a voz da nai, pois xa leva familiarizándose con ela dende que estaba no vientre… Cando a nai lle fala ó bebé, este presta atención, sorrí, imítaa… Entón, por que non lle cantamos xa ós nosos fillos???

Este Canto de berce está adicado ó meu fillo Cibrán que está a piques de cumprir seis meses. Cada noite despois dunha boa choreira Cibrán durme nos meus brazos arrolado ó compás deste e doutros cantos.

Canto de berce para Cibrán

Durme durme meu neniño

Durme meu neno Cibrán,

Que a lúa xa reloce

E o sol volta mañán.

Ea , ea.

Durme Enriba do meu peito

Que che fará de colchón,

Para que escoites moi preto

Como late o corazón.

Ea, ea.

As estreliñas do ceo

Acompáñante no sono,

Para que durmas tranquilo

Para que non durmas solo.

Ea, ea.

Neste berce pequerrecho
Neste berce vas durmir

Para despertar mañán

E novamente sorrir.

Ea, ea.

Pecha os ollos meu neniño

Para poder descansar

E soñar cousas fermosas

Que moito te van gustar.

Ea, ea.

Ea, ea.

Chssssssssssssssssss!!!!!

Berta Castro González