A XXI FEIRA DO VIÑO DO ROSAL TERÁ LUGAR OS DÍAS 19, 20 E 21 DE XULLO

A XXI Feira do Viño do Rosal celebrarase os días 19, 20 e 21 de xullo de 2013.

Na web do Concello comezou a actividade de promoción e xa están expostas as bases que rixen o concurso do cartel anunciador, que o pasado ano gañou a viguesa Alba Castillo Costa.

Dende Noticias O Rosal lembramos que na pasada edición de 2012, en concreto o 13 de xullo, presentouse en sociedade o novo escudo e a bandeira oficiais do Concello, xa legalizados pola Comisión de Heráldica da Xunta de Galicia.

Ler máis

BASES DO CONCURSO PARA O CARTEL ANUNCIADOR DA XXI FEIRA DO VIÑO

Segundo se pode ler na web do Concello do Rosal estas son as bases do Concurso para a selección do "Cartel anunciador da XXI Feira do Viño do Rosal". Lembramos que o pasado ano gañouno a viguesa Alba Castillo Costa.

"O Concello do Rosal, no seu desexo de promocionar os produtos típicos do municipio, convoca o Concurso para a selección do Cartel Anunciador da XXI Feira do Viño, que tamén se estende ós temas hortícolas e florícolas". 

BASES

1.- Poderá participar neste certame calquera persoa, sen límite de idade, tanto residente no noso país como no estranxeiro. 
2.- Establécese un premio individual de 400 € para o cartel gañador. 
3.- O premio poderá quedar deserto se o xurado así o estimase. 
4.- Para optar ó premio, os traballos deben ser orixinais, realizados en cartolina de 44 cms. de ancho por 64 cms. de alto e poderán estar realizados en unha ou varias cores ou fotografía, sen límites en canto a técnicas. Presentaranse en soporte ríxido que permita a súa exposición.
5.- No que atinxe á temática, versará de xeito prioritario sobre o viño, así como a horta e a flor. Deberanse incluir necesariamente os seguintes textos: XXI FEIRA DO VIÑO DO ROSAL e 19, 20 e 21 de xullo de 2013. O cartel non poderá levar inserido ningún logotipo.
5.- Os carteis deberán ser presentados con pseudónimo, acompañados dun sobre pechado no que figure escrito o pseudónimo no exterior e contendo no seu interior o nome e apelidos do autor, DNI ou NIF, enderezo e teléfono de contacto.
6.- Os traballos deberán ser presentados no Centro Social Polivalente (Rúa Cabaqueiros nº 4 - 36.770 O Rosal) na instancia facilitada ó efecto coa indicación: “Concurso para a selección do Cartel Anunciador da XXI Feira do Viño. Concello do Rosal” onde constarán exclusivamente o pseudónimo, o teléfono e a data de presentación. 
7.- O prazo de admisión de carteis pecharase o día 31 de MAIO de 2013 ás 13:00 horas. 
8.- O Xurado darase a coñecer no momento que se estime oportuno. 
9.- Unha vez determinado o gañador do Concurso a decisión do xurado será inapelable, e farase pública antes do día 5 de xuño. A entrega do premio realizarase no momento e xeito que se estimara. 
10.- O Concello do Rosal poderá difundi-lo traballo premiado do xeito que considere oportuno e dispoñerá de tódolos dereitos sobre o mesmo. 
11.- A retirada dos traballos presentados deberá efectuarse durante o mes de xuño de 09:00 a 13:00 perdendo os dereitos sobre os mesmos en caso de non facelo. 
12.- A presentación a este concurso implica a aceptación plena das presentes bases. 

O Rosal, 30 de abril de 2013. 

O ALCALDE 

Asdo. Jesús Mª Fernández Portela

Ler máis

ESTE DOMINGO 5 DE MAIO, ESPECTÁCULO NO AUDITORIO MUNICIPAL DO ROSAL CON "AS POMBAS DE CARBOEIRO"

Informa: Agrupación Musical do Rosal

Este domingo 5 de maio, ás 18,30 h. no Auditorio do Rosal a compañía Fantoches e a banda de música da Agrupación Musical do Rosal ofrecerán o espectáculo "As Pombas de Carboeiro".

Unha sorprendente peza onde se misturan os contos e os cantos, os romances e as lendas, e revélanos a fantástica orixe das pombas de Carboeiro. A representación versa sobre a historia dun frade que trata de convencer ao exército napoleónico de que non sacie a súa fame coa poboación de pombas mensaxeiras do mosteiro de Carboeiro. A través do seu relato, interpretado coa técnica xaponesa do kamishibai -baseada en imaxes impresas en cartolina nunha xanela de madeira que leva unha bicicleta- o vello relixioso descubrirá a historia de amor imposible protagonizada por Cervela (correo de El-Rei Fernando II) e Octavia (a filla máis nova de Lupa de Lobarzán), e que dará orixe á estirpe de pombas que habitan no mosteiro.

A dramaturxia de Inacio Vilariño e Benxamín Otero, ao igual que as súas dotes para manipular monicreques e interpretar contos ou cantos, estará acompañada pola música en directo da Agrupación Musical do Rosal baixo a dirección de Marcel van Bree, que interpretarán as pezas compostas para a ocasión por estes.

Trátase dun espectáculo de dinamización lingüística multidisciplinar que combina a lingua narrada coa dramaturxia, os monicreques e coa música en directo e forma parte do programa "FalaRedes 2013" que percorrerá 19 concellos adheridos á Rede de Dinamización Lingüística da Xunta de Galicia. O acto está organizado polo Concello do Rosal en colaboración coa Agrupación Musical do Rosal.

Ler máis

O SÁBADO 1 DE XUÑO CELÉBRASE A FESTA DA BICICLETA DO ROSAL 2013

O aventureiro Benito Rodríguez na Festa do pasado ano

Segundo nos comunican, o vindeiro sábado 1 de xuño ás 18:00 horas e baixo o lema "Únete á volta", celebrarase a Festa da Bicicleta, con saída e punto de encontro na Praza do Calvario. Como é habitual cada ano, estará organizada polo Concello do Rosal coa colaboración da Deputación Provincial de Pontevedra.

Todos os participantes, que deberán levar casco obrigatoriamente, serán agasallados coa tradicional camiseta. Ao finalizar a carreira realizarase un sorteo.

Ler máis

O PORTEIRO DE BALONMÁN XAVI DÍAZ RENOVA CO BM. VILLA DE ARANDA DESPOIS DUNHA TEMPADA INESQUECIBLE

Foto: Villa de Aranda

O porteiro rosaleiro, Xavi Díaz, seguirá unha temporada máis na élite do balonmán nacional, xa que renovará co seu actual equipo, o Villa de Aranda.

Segundo se pode ler en vavel.com: "El guardameta gallego es el actual quinto mejor portero de la Liga ASOBAL 2012/2013 con casi un 30º de efectividad bajo palos. Su buen rendimiento ha hecho que Xavi y el club hayan llegado a un acuerdo para militar en el equipo ribereño la próxima temporada".

¡¡Dende Noticias O Rosal, a nosa noraboa Xavi!!

Ler máis

"JOSE Y ROSY" ACTUARÁN ESTA FIN DE SEMANA NO ZARAGOZA SALSA CONGRESS

A parella de bailaríns rosaleira "Jose y Rosy" actuará esta fin de semana (3, 4 e 5 de maio) no Zaragoza Salsa Congress, un importante evento internacional que se celebra no municipio mazo de Pedrola.

Velaquí vos deixamos o enlace á web deste congreso de baile.

Ler máis

A ABADÍA DAS EIRAS ACOLLEU UNHA XORNADA DE TURISMO BAIXO MIÑO

O luns 29 de abril tivo lugar na Casa Rural Abadía das Eiras (O Rosal) a Xornada Informativa "Nuevas oportunidades para el sector turístico de O Baixo Miño; los servicios web".

Abriu o acto o presidente de Turismo Baixo Miño, David Villar Alonso, quen deu a benvida aos asistentes.

De seguido tomou a palabra Nuria Patiño Vieites, técnica de Turismo da asociación, ofrecendo unha visión das oportunidades para o Baixo Miño que teñen Internet e o Turismo.

Rematou as intervencións Fernando Coello Vicente, xerente de Índice Publicidad, que presentou o servicio web "google fotos de negocios".

Finalmente, todos os participantes disfrutaron dunha visita guiada por Ángel, propietario da Abadía das Eiras, onde se puideron admirar as súas instalacións.

Ler máis

RUTA GUIADA POLOS MUÍÑOS DO FOLÓN E PICÓN, MAÑÁ VENRES ÁS 11 DA MAÑÁ

Este venres 3 de maio ás 11 horas, celébrase unha ruta polos Muíños do Folón e Picón, guiada por Juan Ramón Martínez Barbosa, emprendedor sociocultural baixomiñoto e coautor do libro "Os muíños do Folón e do Picón na vila do Rosal. Conxunto histórico-etnográfico de Galicia", publicado en 2009.

O prezo da inscrición para poder participar será de tan só 3 euros, podendo pagar antes ou despois de realizar a ruta.

A dificultade do percorrido é media-baixa, cunha distancia de 3'5 quilómetros e 2 horas de duración.

O punto de encontro será o Muíño das Laxes (nº 1 do Folón, en Martín, fronte á coñecida "casa de Cadilla").

Para apuntarse: confirmar nome, apelidos e teléfono de contacto no correo noticiasorosal@hotmail.com ou ben en juanorosal@hotmail.com e tamén no móbil: 637 311 007.

Ler máis

ÉXITO DE PÚBLICO E ORGANIZACIÓN DO C.C. O ROSAL NO VIII TROFEO COMUNIDADE DE MONTES DE SANTA MARIÑA 2013

Foto: Club Ciclista O Rosal

O pasado sábado 27 de abril disputouse o VIII Trofeo Comunidade de Montes de Santa Mariña organizado polo Club Ciclista O Rosal.

Tal e como se lembra na súa web, houbo gran asistencia de público "a pesar do intenso frío".

Destacar a vitoria de Yasir Martínez na categoría de Principiantes e a actuación da debutante Sara Álvarez.

Na categoría Alevín, Mario Fernández conseguía o segundo posto e na Júnior, Raúl Fernández remataba no sétimo lugar.

Velaquí vos deixamos a crónica e a reportaxe fotográfica, realizada polo Club Ciclista O Rosal.

Ler máis

O ROSAL RENDE A SÚA ÚLTIMA HOMENAXE E ADEUS AO RVDO. D. VICTORINO POUTÁS RODRÍGUEZ, PÁRROCO DURANTE 50 ANOS

O Rosal ofreceu o xoves 25 de abril ás 16:45 h., na igrexa parroquial de Santa Mariña, o seu último adeus ao Rvdo. D. Victorino Poutás Rodríguez, que faleceu o mércores 24 de abril, aos 86 anos. A esa hora celebrouse o funeral de corpo presente e posteriormente procedeuse á súa inhumación no cemiterio.

Dende Noticias O Rosal lembramos -segundo datos do recoñecido historiador local Xoán Martínez Tamuxe- que D. Victorino foi abade desta freguesía dende o 8 de setembro de 1957, na que foi nomeado Cura Ecónomo, substituíndo ao Rvdo. D. Juan Pérez Martínez. 

Destacamos que D. Victorino Poutás naceu en San Adrián de Vieite, concello de Leiro (Ourense) o 13 de setembro de 1926. Cursou estudos eclesiásticos no Seminario Conciliar de Tui, licenciándose en Sagrada Teoloxía pola Universidade de Salamanca, onde tamén fixo o curso de Doutor. Ordenouse sacerdote en Vigo o 25 de xuño de 1950.

D. Victorino foi profesor no Colexio PP. Somascos e no Instituto da Sangriña, ambos da vila da Guarda. En 2001 foi nomeado Cóengo da Santa Igrexa Catedral de Tui-Vigo. 

Con el fixéronse obras na igrexa, no adro e na reitoral do Rosal. As últimas, costeadas pola súa conta, foron a limpeza dos artísticos altar maior (retablo barroco) e a restauración dos frescos do coro.

O día 1 de novembro de 2006, o bispo D. José Reboredo nomeou en substitución de D. Victorino, como párroco de Santa Mariña ao abade actual, D. Julio Ramos Rodríguez.

Dende Noticias O Rosal, o noso máis sentido pésame. Descanse en paz, D. Victorino.

Ler máis

O CLUB CICLISTA O ROSAL CELEBRA ESTE SÁBADO 27 O VIII TROFEO COMUNIDADE DE MONTES SANTA MARIÑA DO ROSAL

Tal e como se pode ler na web do Club Ciclista da vila que preside Gerardo Álvarez Martínez "este vindeiro sábado 27 a partir das 16:30 da tarde o Club Ciclista O Rosal organiza o VIII TROFEO COMUNIDADE DE MONSTES SANTA MARIÑA para as categorías de Principiantes, Alevíns, Infantís, Cadetes e Júnior.

A categoría Principantes reallizará unha Ximcana na Praza do Calvario mentras que o resto de categorías completarán un circuito con saída na Praza do Calvario continuando pola rúa Simón del Mazo, Furnos, Gandarela, estrada de Sandián, rúa Jesús Noya e de novo Praza do Calvario".

Ler máis

NEMESIO CASTRO SERÁ HOMENAXEADO POLA AGRUPACIÓN MUSICAL DO ROSAL

O popular veciño Nemesio Castro Álvarez, de Martín, será homenaxeado pola Agrupación Musical do Rosal o vindeiro mes de xuño con motivo do XXVII Aniversario desta asociación.

Nemesio é -xunto a Antonio Granja e Jesús González- un dos grandes colaboradores e unha das persoas que máis tempo teñen estado na Xunta Directiva da Agrupación Musical.

Así o podemos ver reflectido no libro publicado en 2011, editado pola propia Agrupación, con textos da autoría de Carlos Villanueva Domínguez e que foi coordinado por Monserrat Domínguez Otero.

Ler máis

ESTE DOMINGO, TEATRO NO AUDITORIO COA OBRA "DOS EN LA CORNISA"

Este domingo 28 de abril ás 19:39 horas, terá lugar no Auditorio Municipal do Rosal a representación da obra "Dos en la cornisa", da compañía de teatro 105 BESOS.

Tal e como reza o cartel: "Dos vidas paralelas destinadas a cruzarse entre sí que desembocarán en el eterno dilema: ¿qué buscan las mujeres? ¿qué quieren los hombres?".

Ler máis

FESTAS DE SAN XOSÉ OBREIRO EN NOVÁS. 30 DE ABRIL E 1 DE MAIO DE 2013

O martes 30 de abril e o mércores 1 de maio celébranse en Novás as Festas de San Xosé Obreiro.

O día 30, gran verbena a cargo da orquestra Xacobeo e o grupo América, que se prolongará ata altas horas da madrugada.

O día 1, ás 11:30 horas da mañá, acompañado do grupo de gaitas A Boalleira, baixada do Santo en procesión ata a Praza de Novás, onde se celebrará ás 12 h., unha misa de campaña na honra de San José, cantada pola Coral da Agrupación Musical do Rosal.

Xa de tarde, a partir das 18:00 horas, actuación do grupo folk Lareira. A continuación, actuación do grupo de humoristas Os Sete Magníficos máis un, co espectáculo O gordo e o calvo van ao médico.

Haberá subasta de produtos típicos, rematando as festas co grupo folk Lareira.

Ler máis

A PINTORA MARY VARELA EXPÓN NA CASA DO TURISMO DE VILA NOVA DE CERVEIRA

A pintora María del Carmen Varela Velasco, "Mary Varela", natural de Sober (Lugo) e residente dende hai uns anos en Couselo (O Rosal), expón parte da súa obra na Casa do Turismo de Vila Nova de Cerveira (Portugal).

Baixo o título de "Pensando en la Luz", Mary Varela mostrou na galería lusa unha decena de cadros da súa autoría, estando aberta a exposición ata o sábado 11 de maio.

A concelleira de Cultura do Rosal, Charo Tabales Perozo e a tenente de alcalde e concelleira de Muller, Mª Carmen Alonso, como reflicte a imaxe, xa visitaron esta fermosa mostra pictórica.

Ler máis

A DÉCIMA EDICIÓN DA FEIRA DO LIBRO DO ROSAL CELÉBRASE ESTE DOMINGO 21 DE ABRIL NA PRAZA DO CALVARIO

Este domingo 21 de abril celebrarase na Praza do Calvario a X edición da Feira do Libro do Rosal que organiza a concellaría de Cultura que dirixe Charo Tabales Perozo.

Tal e como reza o cartel, haberá un 20% de desconto na merca de libros, celebrándose a partir das 12 da mañá contacontos, maxia e guiñol. Xa ás 5 da tarde, obradoiro de papiroflexia.

Ler máis